ఈ రోజు అర్థరాత్రి నితిన్ 30వ చిత్రం టైటిల్, ఫస్ట్ లుక్ విడుదల

బాలీవుడ్ హిట్ చిత్రం అంధాధున్ చిత్రాన్ని తెలుగులో నితిన్ హీరోగా రీమేక్ చేస్తున్న సంగతి తెలిసిందే. నితిన్ కు ఇది 30వ చిత్రం. ఈ సినిమా టైటిల్, ఫస్ట్ లుక్ లను ఈ రోజు అర్థరాత్రి 12 గంటలకు విడుదల చేయనున్నారు. ఈ సినిమాను నితిన్ కుటుంబ సభ్యులే నిర్మిస్తున్నారు. నితిన్ తండ్రి సుధాకర్ రెడ్డి, సోదరి నికితా రెడ్డి నిర్మాతలుగా వ్యహరిస్తున్నారు.

మేర్లపాక గాంధీ దర్శకత్వంలో రూపుదిద్దుకుంటున్న ఈ చిత్రంలో నభా నటేశ్, తమన్నా ముఖ్యపాత్రల్లో నటిస్తున్నారు. ఈ చిత్రం ద్వారా అంధుడైన పియానో వాద్యకారుడిగా నితిన్ తన కెరీర్ లోనే విలక్షణ రోల్ పోషిస్తున్నాడు. కాగా ఈ సినిమా జూన్ 11న ప్రేక్షకుల ముందుకు రానుంది. ఈ చిత్రానికి మహతీసాగర్ సంగీతం అందిస్తున్నాడు. బాలీవుడ్ లో వచ్చిన అంధాధున్ చిత్రంలో ఆయుష్మాన్ ఖురానా హీరో కాగా, రాధికా ఆప్టే హీరోయిన్ గా నటించింది.